Sirao elementary, secondary school pabiyaan ni Oliva

Gimanduan na ni City Department of Education Supt. Dr. Leonilo Oliva ang prinsipal sa Sirao Elementary School ug Sirao National High School nga biyaan ang maong tunghaan nga nahimutang sa maong lugar ug ibalhin ang mga klase niini didto sa tunghaan sa silingang barangay sa Guba sakop ning dakbayan sa Sugbo.

Si Oliva miluwat ning mao niyang direktiba human mikompirmar ang mga tinugyanan sa Mines and Geo-sciences Bureau sa DENR-7 nga peligro sa landslide ang maong lugar ug naghatag og kakuyaw sa sitwasyon sa mga tinun-an.

Miluwat og direktiba si Oliva ngadto sa prinsipal sa Sirao Elementary School nga si Risalinda Cairo ug prinsipal sa Sirao National High School nga si Normando Panilagaron nga kanselahon ang pagpahigayon sa klase sa maong lugar sa labing daling panahon.

Kagahapon sa buntag personal nga gibisita ni Oliva ang maong lugar ug nakigtigum kini ngadto sa mga magtutudlo ug ginikanan sa mga bata kabahin sa estado sa maong lugar may labot sa giluwatan niyang direktiba.

Nasayran nga ang barangay Sirao nalakip sa upat ka mga barangay nga gikonpirmar sa DENR nga peligro sa landslide susama sa nahitabo didto sa Guinsaugon, Saint Bernard,Southern Leyte ug ang uban pang mga barangay dinhi sa siyudad nga peligro sa landslide naglangkob sa Pung-ol Sibugay, Sudlon ug Busay.