Ate Glo, Imelda Marcos nag-abot sa St. Bernard

SAINT BERNARD, Southern Leyte – Si Presidente Gloria Arroyo ug kanhi Unang Ginang Imelda Marcos nag-abot didto sa St. Bernard, So. Leyte kagahapon aron sa paghatag sa ilang moral support sa katawhan sa maong dapit.

Suma sa report sa Banat News reporter nga gipada sa maong lugar sa trahedya, si Mrs. Marcos mora lag nisimhot sa dapit kay matud niya wa siyay lain tuyo kundili ang paghatag rag moral support.

Si Presidente Gloria Arroyo misusi sa gikahitaboan ingon man mipaabot sa iyang kasubo ngadto sa mga survivors nga gipakigtagboan niini diha mismo sa maong dapit apan wala na moadto sa evacuation center human libuta ug gitan-aw ang kahimtang sa operasyon.

Si Arroyo luwan sa presidential chopper gisugat ni Southern Leyte Governor Rosette Lerias ug Mayor Maria Lim uban sa mga opisyales sa military ug midiretso sa kubol sa National Disaster Coordinating Council diin si Lerias misaysay sa mga panghitabo gikan sa wala pa mohulpa ang bukid sa Can-abag hangtud sa kahimtang karon.

Human sa briefing gipakigkitaan ni Arroyo ang kinse sa kapin 20 ka mga tawong naluwas sa maong trahedya nga gidala diha sa command post, ang mga biktima gihatagan ni Arroyo og hinabang nga P5 mil matag usa ug mimando sa Government Social Insurance Service sa pagpadali og pagawas sa mga loans ug benipisyo sa mga biktima.

Dugang sa gimandoan ni Arroyo ang Mines and Geo-sciences Bureau aron paghimo og aerial survey sa tibuok lalawigan sa Southern Leyte subay usab sa hangyo ni Lerias gumikan kay sa pagkakaron dunay mga lungsod sa lalawigan nga nameligro sa lain na usab nga susamang trahedya gumikan sa pag-ulan.

Human niini gitagsa-tagsa og pasalamat ni Arroyo ang mga rescuers nga midugok sa pagtabang sa mga taga Saint Bernard ug ingon man sa mga langyawng rescuers, ang mga Amerikano, Malaysians, Spanish ug Taiwanese.

Si Mrs. Arroyo wa magdugay sa St. Bernard kay duna pa siyay laing commitments dinhi sa Sugbo.