Mamutol og lubi isipon nang rebelde

Isipon nang rebelde batok sa gobyerno ang mga ilegal nga mga mamutol og punoan sa lubi busa, mga sundawo na ug kapolisan maoy mosikop kanila, matud pa ni Regional Director Deodiro Ravelo sa Philippine Coconut Authority (PCA-7).

Matud pa ni Ravelo nga iya nang gipadangat sa Malacañang ang iyang hangyo nga palihukon na ang mga otoridad karong milipang ang mga "illegal cutter" og lubi dinhi sa rehiyon 7.

Apan dili lamang dinhi sa Central Visayas kundi labaw sa tanan ang taga Mindanao maoy grabe kaayo kay tua didto ang labing daghang coco lumber nga gipamaligya nganhi sa Cebu.

Sa pagkakaron ang rehiyonal nga buhatan sa PCA nakasakmit nagkapin sa usa ka gatos ka mga "chain saw" o gabas para sa lubi.

Matud pa ni Deodiro nga ang gabas nga dili lukatan og lisensya, usa ka ilegal sama sa usa ka armas de fuego, busa sakmiton kini sa PCA tungod kay mao kini gamiton sa pagpamoril sa punoan sa lubi o kaha mga dagkong kahoy.

Gisaway usab ni Ravelo ang ubang mga opisyal sa barangay kinsa way "political will" busa dili makabadlong sa mga "illegal cutter" nga mosulod og mamuril og lubi sa ilang barangay.

Miingon si Ravelo nga misamot karon ka estrikto ang balaod, sa tuyo nga maprotihian pag-ayo ang kalubihan sa nasud ilabi na nga puro lana na sa lubi ang ihulip sa krudo nga gipadagan sa mga diesel nga makina sa sakyanan.

Matud pa ni Ravelo nga gumikan sa kabulawanon na karon sa lubi, kinahanglang gamiton na sa kagamhanan ang puwersa militar ug kapolisan aron masikop sa mga illegal cutter niini.

Ang ilang pagpamuril sa lubi isipong pagsabotahe sa ekonomiya sa nasud, matud pa ni Ravelo.

Sa pagkakaron dul-an nang usa ka gatos ang natanggong sa mga prisohan sa Central Visayas gumikan sa ilegal nga pagpamutol sa lubi.