Tedy mopadala'g salapi ngadto sa St. Bernard

Mokabat sa P500,000 nga salapi ang ipadala nga hinabang ni Mayor Thadeo Ouano sa dakbayan sa Mandaue ngadto sa mga biktima sa pagdahili sa yuta sa barangay Guinsaogon sa St. Bernard, Southern Leyte.

Nunot niini, si Konsehal Wenceslao Gakit nga maoy chairman sa committee on budget and appropriation sa konseho sa maong dakbayan mopalabang og resolusyon atol sa regular session alang sa maong katuyoan.

Si Ouano nga maoy nag-awhag kang Gakit pagpalabang og resolusyon mipasabot nga ang maong kantidad pagakuhaon gikan sa pundo sa ilang calamity fund.

Dugang pa ni Ouano nga kuwarta na lang ang ilang ipadala nga tabang alang sa mga biktima sanglit lisud man ang transportation sa pagpadala og mga relief goods sa maong dapit.

Sumala pa ni Ouano nga ang lokal nga mga opisyal na sa maong dapit ang mag-igo kun unsay gamitan sa maong salapi alang sa mga biktima.

Matud pa sa mayor nga ipaagi lamang sa tseke ang pagpadala sa kuwarta ngadto kang Gobernador Rosettee Lerias nga nahimo na usab nga suod sa ilang pamilya.