Bomba mibuto sa Malacañang

Naukay ang mga kawani ug mga guwardiya sa Malacañang kagahapon sa udto human mibuto ang gituohang bomba duol sa Mabini Hall sa Gate 7.

Ang mga nakasaksi sa pagbuto nagkanayon nga natay-og gyud ang yuta atol sa pagbuto.

Apan gihimakak sa Malacañang nga bomba ang mibuto sa palibot sa Palasyo sa presidente.

Sumala pa sa pamahayag gikan sa Palasyo nga basurahan nga gigamit sa hardenero nga gituohang adunay kemikal ang mibuto ug dili bomba.

Si Brig. Gen. Delfin Bangit, hepe sa Presidential Security Group miasoy sa mga tigbalita nga wala silay nakitang bomba sa palibot sa Palasyo duol sa Mabini Hall.

Gikonpirmar ni Bangit nga adunay nakitang trash can ang mga sakop sa PSG nga matud pa maayong pagkabungkag.

Gihimakak ni Bangit nga gituyo og butang ang maong basurahan sa maong lugar aron pabuthon.

Kagahapon, gipaubos sa maximum alert level ang kasundalohan ug kapolisan tungod sa mga protesta ug mga rally tungod sa nagsingabot nga ika-20 nga kasumaran sa Edsa revolution nga mibutang sa gahum ni kanhi Pres. Corazon Aquino.

May mga intelligence report nga nadawat ang mga awtoridad nga adunay nagplano nga i-assassinate si Pres. Arroyo.

Ang mga sakop sa Magdalo group nga miilog sa Oakwood Hotel sa Makati mihulga nga mohimo og mass escape ug mopahigayon og kasamok atol sa Philippine Military Academy (PMA) Alumni Homecoming.