Mandaue-Norkis MOA sa Looc lot giputol

Ang Legal Office sa kagamhanan sa dakbayan sa Mandaue mipahibalo sa dakong kompaniya nga giputol na niini ang kasabutan tali sa lokal nga kagamhanan ug sa maong kompaniya pag-okupar sa luna nga iya sa Mandaue City sa dalan Plaridel, Barangay Looc.

Si Atty. Erwin Rommel Heyrosa mipadala og notice of rescission sa memorandun of agreement (MOA) tali sa kagamhanan sa Mandaue ug sa Norkis Trading Corp. sa miaging adlaw.

Sumala pa sa notisya nga ang pagputol sa gikasabutan tungod kini sa kalapasan sa kompaniya sa paragraph 7 nga automatic ma-terminate ang kasabutan kun mapakyas ang hain kanila sa MOA.

Matud pa ni Heyrosa nga sa MOA, ang 17 mil metro kuwadradong luna sa kagamhanan himuon nga mini-park ug children's playground.



Sa duha ka tuig nga pag-okupar nga giabangan sa kompaniya og P600 matag tuig ang luna, gihimo kining display center, matud pa ni Heyrosa.

Giplanohan unta nga tukoran og bilyaran ang maong luna nga ang kita adto mapunta sa Norkis Provident Fund alang sa mga retiradong kawani sa maong kompaniya, apan wala mosugot ang kagamhanan.

Ang MOA gipirmahan tali ni Mayor Alfredo Ouano ug Norberto Quisumbing, presidente sa Norkis, niadtong Enero 18, 1993.