Polis nakaaksidente'g policewoman piyansado

Gawasnon na si PO3 Rogelio Castañeda human kini tugoting makabayad og P20 mil nga piyansa ni Judge Francisco Seville sa Municipal Trial Court in the Cities (MTCC) branch 7.

Ang pusil ni Castañeda aksidenteng mibuto dihang iya kining gisusi ug si SPO4 Grace Remata Retuya maoy naigo niini nga maoy hinungdan sa iyang hinanaling kamatayon.

Ang insidente nahitabo niadtong Biyernes sa hapon diha sa buhatan ni Retuya sa administration sa Cebu City Police Office.

Si Castañeda gipasakaan og kasong reckless imprudence resulting to homicide tungod sa maong insidente.

Kagahapon si Seville miluwat og release order ni Castañeda human kini mobayad og piyansa alang sa iyang temporaryong kagawasan.

Si Police Supt. Melvin Gayotin, acting director sa CCPO mibutyag kagahapon nga si Castañeda ibalhin og destino sa Security Service Group (SSG) ug dili na kini ibutang sa field work.

Ang Criminal Intelligence Investigation Bureau (CIIB) maoy mopahigayon og imbestigasyon sa maong hitabo.

Gitataw ni Gayotin nga si Castañeda makabalik sa serbisyo tungod kay wala tuyoa niini ang nahisgutang insidente.

Matud ni Gayotin nga kadaghan na siyang nagpahimangno ngadto sa mga polis sanglit nagtudlo usab siya sa training center nga dili mag-load sa ilang mga armas kun naka-open hammer kini aron malikayan ang aksidente.

Si Gayotin midungag nga magpadala siya og memorandum sa tanang police station sa dakbayan nga magpahimangno nga "no toying or drawing of firearms inside the camp" aron malikayan nga mausab pa ang samang hitabo.