11 ka barangay gipabiyaan sa gobernador

ST. BERNARD – Onse na ka barangay ang gipabiyaan sa gobernador sa Southern Leyte, Gobernador Rosette Lerias gumikan sa peligrong mohulpa ang ilang mga dapit tungod sa nakitang 'liki' sa yutang ilang gikahimutangan.

Migamit pa og mga polis si Lerias aron lang abugon ang mga residenteng dili buot nga mobiya sa ilang mga pinuy-anan.

Ang maong mga barangay mao ang barangay Guinsaogon nga maoy direktang naigo sa mudslide, Ayagan, Nueva Esperanza, Sug-angon, Asuncion, San Isidro, Tambis Uno, Tambis Dos, Maria Socorro, Bantawan ug Bagatas.

Matud pa ni Lerias sa pakighinabi sa Banat News ang maong mga lugar, matud pa sa mga eksperto, nabutang sa fault line diin kasagarang agian sa linog ug nabutang kanunay sa peligro sa mga residente sa bisan unsang oras.

"Karon ako gyung giingnan ang mga polis, bodily they have to pull them away from homes," matud pa sa gobernador.

Gitugotan lang ni Lerias nga magbilin og upat ka baskog ug abtik nga mga miyembro sa matag usa ka panimalay aron maoy mobantay uban sa mga sakop sa kapolisan.

Ang mga residenteng gipalikay una sa ilang mga lugar gibutang sa sports complex sa lungsod, sa tugkaran sa San Isidro Church, Saint Bernard Central Elementary School diin hatdan sila og mga relief assistance.

Gipasabot ni Lerias nga walay angayang ikabalaka ang mga gipabalhin pag-abot sa kalimpyo sa evacuation center gumikan kay dunay Alemang eksperto niini ang gipadala sa gobiyermo sa Germany nga maoy mibantay alang niini.

Kagahapon ang operation center atol ning pagsulat sa balita wala pay tukmang ihap kun pila ka mga tawo gikan sa maong mga barangay ang nadala sa mga evacuation center.

Samtang atol ning pagsulat duna nay 62 ka mga patay'ng lawas ang naugkat, 35 niini nailhan na sa mga kapamilya ug 27 ang wala pa mailhi gumikan kay nagsugod na kini og kadugta.

Kagahapon usa sa mga naugkat naputol ang hawak ug nawala na ang kapikas niini sa ibabaw nga bahin sa lawas, usa kini ka lalaki, samtang ang mga rescuers inabagan sa mga bag-ong abot nangusog sa ilang operasyon gumikan sa paborableng panahon.

Sukad sa pagkahugno sa maong bukid nagpunay na kini og uwan hangtud sa ikaduhang adlaw, ang kagahapon tibuok adlaw uga ug walay pag-ulan hinungdan nga nimenus ang nangalubong sa lapok sa habig sa mga rescuers.