BJMP suportado sa Mandaue

Higpit gayod nga gisuportahan ni Mayor Thadeo Ouano ang Bureau of Jail Management and Penology (BJMP) sa dakbayan sa Mandaue sanglit nagpadayon man usab ang gipakitang maayong pagdumala sa pagbantay sa bilanggoan sa maong siyudad.

Matud pa ni Ouano nga ang pagsuporta sa kagamhanan sa dakbayan dili lamang sa paggahin og salapi alang sa incentive allowance sa matag bulan sa mga jailguards kun dili lakip na sa padayon nga pagpa-ukupar sa luna sa kagamhanan nga maoy nahimutangan sa City Jail.

Gipasabot ni Ouano nga ang pagpadayon pagpa-okupar sa luna nga gipanag-iya sa kagamhanan ang magpabilin sa ilang pag-okupar hangtod sa paglabay sa 25 ka tuig nga gidugayon.

Matud pa niya nga ang mokabat sa 1,463 nga metro kuwadradong luna magpadayon sa pag-okupar nga maoy ilang gikasabutan nga ilang gipirmahan.

Matud ni Ouano ubos sa maong kasabutan nga ilang gipirmahan ni Jail Warden Jose Moring nga ang buhatan sa Bureau Jail Management Penology (BJMP) hatagan og kahigayonan sa pagpalambo sa maong bilanggoan, balayranan sa kuryente, tubig ug uban pa hangtod nga kun mamalhin og edipisyo maangkon na sa kagamhanan sa dakbayan aron manag-iya niini.