Guardo gitugyan ni Tomas sa COA

Gitugyan na ni Mayor Tomas Osmeña ngadto sa Commission on Audit (COA) kun obligahon ba niini si kanhi Cebu Southeast Asian Games Organizing Committee chairman Jonathan Guardo kabahin sa paghatag og husay sa tanang nagastu sa pagpahigayon sa Southeast Asian Games dinhi sa Sugbo niadtong miaging bulan sa Nobiyembre ug Disyembre sa milabay'ng tuig.

Si Osmeña nakahukom nga ang Coa na lang maoy mopursige kang Guardo pagduso sa liquidation niini tungod sa padayong pagmagahi niini nga moduso ngadto kaniya sa maong report.

Subling gipasabot sa mayor nga ang paghatag lang gyud og tukmang husay sa publiko ilabi na sa mga sponsor sa maong kalihukan ang iyang tuyo sa pag-obligar kang Guardo.

Mao kini reaksyon sa mayor sa giluwatang pamahayag sa labaw sa Organizing Committee sa Philsoc nga si Jose Cojuangco diin gipadayag niini nga wala nila obligaha ang mga lokal nga organizing committee nga moduso og liquidation report ngadto sa ilang tagsa tagsa ka lokal nga kagamhanan kabahin sa maong kalihukan.

Kini gawas lang kun ang mga hingtungdang lugar mitampo og gahin sa maong komitiba nga naapil sa ilang gigamit og gasto sa maong kalihukan.

Nagkanayon si Osmeña nga kun siya maoy pabut-on angay gyud nga mohatag og husay sa publiko si Guardo ilabi na gyud sa mga Sugboanon gumikan kay dili kini mabutang sa maong posisyon kun wala pa niya kini itudlo isip chairman sa Cebu City Sports Commission.

Niadtong milabayng mga adlaw una nang gibutyag ni Osmeña nga iyang ipa-Ombudsman si Guardo nga gitubag usab dayon sa nauwahi nga wala niya ikabalaka gumikan kay matod niya lihitimo ang gidapatan sa tanang pundo nga iyang nadawat gikan sa Philsoc ug sa mga sponsors sa maong kalihukan.