US Marines, Malaysians nangabot sa St. Bernard

ST. BERNARD – Nangabot na kagahapon ang mga sakop sa 31st Expeditionary Force sa US Marine Corps nga nagbase sa Okinawa, Japan lakip na usab ang mga Malaysia rescruers aron abagan ang padayong rescue operation diha sa barangay Guisaogon, lungsod sa Saint Bernard, Southern Leyte.

Ang unang kinse ka tropang mga Amerikano nangabot pasado alas 8 na sa gabii niadtong Sabado nga gilangkuban sa mga engineers, communication specialist, aviation specialist ug uban aron paghimo og assessment sa lugar.

Matud pa ni Capt. Burrel Parmer, ang tigpamaba sa maong grupo sa pakighinabi sa Banat News nga miadto sila sa maong lugar aron pagtabang sa mga biktima.

Kagahapon ang mga CH-46E-Sea Knight helicopters nangabot dala ang mga doktor, mga suplay sa pagkaon, medisina ug uban pang panginahanglan sa mga biktima.

Matud pa ni Parmer nga ang tibuok kalibutan nasayod na sa nahitabo sa maong lugar, gani mismong ang Pentagon maoy mimando kanila sa pagsusi sa lugar ug ipadala pinaagi sa internet ang mga makuhang impormasyon ilabi na ang kahimtang sa site aron matino kun unsay tabang nga ipadala.

Samtang nangabot usab kagahapon ang mga sakop sa Special Malaysian Assistance and Rescue Team (SMART) nga gikan pa sa ilang nasud luwan sa abyon nga mitugpa sa Tacloban.

Dala sa mga Malayo ang ilang mga sakyanang all terrain vehicles, mga four-by-four nga power tools alang sa operasyon, pinangulohan ang 25-man team ni Capt. Anuar bin Kaliman.

Ang grupo gilangkuban sa mga rescuers, paramedics ug staff, ang grupo dunay kaugalingong mga suplay sa ilang panginahanglan lakip na sa kaugalingong generator.

Dugang sa mga hinabang nga nangabot mao ang gikan sa dakbayan sa Sugbo nga gidala ni Gobernador Gwendolyn Garcia ug Bokal Jose Mari Gastardo kinsa maoy gitudlong mission chief.

Gawas sa mga trak sa mga bugas, de lata, tubig, mga tambal ug habol misaad usab si Garcia og hinabang nga P5 milyones alang sa rehabilitasyon sa mga nabiktima.

Si Southern Leyte Governor Rosette Lerias mahinangpon sa nadawat nga hinabang gikan sa Sugbu samtang si Garcia human makakita sa sitwasyon mipadayag nga dunay pagahimuong pagtuki sa kaandam sa probinsiya sa Sugbu sa bisan unsang trahedya.