Manghod napusilan sa maguwang

Manghud aksidenting napusilan sa iyang maguwang atol sa kaguliyang nga nahitabo sa barangay Talisay, lungsod sa Santander, alas 11 pasado sa buntag sa niaging adlaw.

Ang napusilan patay usa ka Franklin Busmeon, Jr., 40 anyos ug minyo samtang ang nakapusil kaniya ang iya ra nga igsoon nga si Beverly Busmeon alyas Lito, 41 anyos, minyo.

Matud pa sa imbestigador sa kapolisan sa lungsod sa Santander, SPO1 Amelito Alcala nga sa wala pa ang hitabo, usa ka Rufo Genel ang gikalalis ni Lito.

Si Franklin didto laban kang Genel ug ila gitabangan og lalis si Lito.

Sumala pa ni Alcala nga sa dihang nagdaku na ang lalis, nikuha og 9mm pistola si Lito ug nipasalba aron mahunong na ang lalis.

Base sa imbestigasyon sa kapolisan nga walay gitumong si Lito sa iyang pagpaboto sa armas apan mao nalang ang iya nakit-an nga nahagba na ang iyang igsoon sa una pa lang boto sa armas.

Tulo ka higayun nga nakaboto ang armas ni Lito hinungdan nga naigo usab ang usa ka Rufo Andrade kinsa kauban sa grupo ug nisuway usab sa pag-ukang sa lalis.

Daling gidala sa Oslob District Hospital si Franklin ang nurse on duty nga si Daisy Pilosopo ang nagpahibawo sa kapolisan nga dead on arrival ang biktima.

Samtang si Andrade ang dali usab nga gidala sa usa sa mga tambalanan sa dakbayan sa Sugbo.

Si Lito nisurender sa kapolisan human sa hitabo.

Apan sumala pa ni Alcala nga si Lito adto unta mosurender sa Oslob Police Station apan naaksidenti ang gisakyan niini sa may Pasil, Santander hinungdan nga gikuyugan nalang siya sa Santander Police Station.

Dugang pa ni Alcala nga walay plano ang inahan sa biktima nga mopasaka pa og kiha batok sa iya usab anak nga suspek.

Magsabot lang ang pamilya ilabi na sa pagsustento sa mga anak sa biktima.