Polis nakadasmag

Usa ka polis nga nagmotorsiklo naangol ug nalandig sa tambalanan human gikabangga sa laing motorsiklo.

Ang polis nailhan nga si PO2 Rafael Baritua, minyo, nga taga Bonbon, lungsod sa Aloguinsan ug nadestino sa 703rd Provincial Mobile Group.

Si Baritua nagmaneho sa iyang RXT 135 Yamaha nga motorsiklo niadtong Miyerkules, alas 2 sa kaadlawon, padulong sa lungsod sa Aloguinsan.

Paghiabot sa dulhugon nga bahin sa barangay road sa Bogo, Aloguinsan, iyang gikasugat ang nagtungas nga Honda XRM nga motorsiklo nga gimaneho sa usa ka Ramonito Dayanan nga taga Saksak, Aloguinsan.

Base sa imbestigasyon sa kapolisan sa lungsod sa Aloguinsan nga kurbadahon ang lugar diin nagkabangga ang duha ka motorsiklo.

Ang duha pulos nangaangol ug gidala sa Pinamungajan District Hospital apan gibalhin kini sa Vicente Sotto Memorial Medical Center aron matambalan ang mga samad ug pangos nga ilang nahiaguman.