70-anyos nga biyuda gi-ulod nang nakit-an

Nasuta sa kapolisan sa Oslob nga wa gyuy "foul play" ang kamatayon sa usa ka 70 anyos nga biyuda kansang patay'ng lawas giulod na sa iyang uma didto sa sitio Ambakon, Gawi, Oslob niadtong Domingo.

Matud pa ni SPO1 Antonio Resquites, nga gitak-opan na nila ang imbestigasyon sa kamatayon ni Matilde Oliquino, 70, biyuda, taga Ambakon dihang namatud-an nilang namatay kini nga wa binuangi og tawo.

Hinuon ang teyorya sa kapolisan, mao usay hunahuna sa mga tagtungod ug pamilya sa namatay nga may dakong kalagmitang gisak-an og kabuhi ang tiguwang.

Matud pa ni Resquites nga maoy pagduda nilang tanan kay basin dihang gisak-an og kabuhi ang biktima, nalipong kini hangtod nga nakuyapan.

Gumikan kay nag-inusara ug walay nakatabang kaniya, gikabsan sa kinabuhi ang tiguwang, matud pa sa kapolisan.



Ang mga anak sa biktima mibutyag sa kapolisan nga migikan kini sa ilang balay niana pang Sabado sa buntag kay miadto sa iyang uma aron atimanon ang iyang mga hayop.

Apan gibatig kabalaka ang tanan dihang miabot nalang ang kagabhion sa Sabado wa na gyud mopauli ang ilang inahan.

Gipangita nila nianang tibuok adlaw'ng Domingo hangtod nga napalgan ang iyang patay'ng lawas niana nang alas 7:00 pasado sa gabii didto sa iyang uma.

Matud pa sa kapolisan nga walay bun-og ang lawas sa tiguwang ug walay timailhan nga gibinuangan kini.

Hinuon gumikan kay kusog ang uwan nianang Sabado ug Domingo, napuno na sa ulod ang ulo sa biktima, miburot na ang lawas niini ug nangalisbo na ang iyang baho.

Sa pagkakaron wala nay mga mireklamong mga tagtungod sa biktima kay nagtuo na sila nga namatay kini nga wala hilabti og tawong dautan. - Wen Celen