Coco diesel solusyon sa problema

Sugod karong Mayo, may kaugalingon nang suplay ang nasud sa puro nga coco-diesel (CD) alang sa mga sakyanang diesel ang makina.

Kini ang "good news" matud pa ni Regional Director Deodiro Ravelo sa Philippine Coconut Authority (PCA-7.)

Kining maong CD mas barato pa sa kasamtangang presyo sa diesel oil nga gikan sa "fossils" nga maoy gigamit sa tibuok kalibotan.

Pinaagi niining nadiskobre karon sa kagamhanan, dili na magsalig ang nasud sa imported nga diesel oil tungod kay nia naman dinhi ang kaugalingong suplay niini nga manukad sa lubi.

Giasoy ni Ravelo nga ang mga sakyanan sa PCA sa Manila puro CD na ang gitubil ug "wala nay additives" o sambog nga laing kemikal.

Matud pa niya nga nasinatian nila ang maayong kondisyon sa mga makina sa ilang mga sakyanan, walay aso, ug labing milig-on ang mga piyesa ug ang kahapsay sa performance sa dagan niini.

Sa pagkakaron mao nay girabaho sa gobyerno ang pagpakusog sa "processing" kon sa kopras sa lubi aron gam-on nga CD.

Mitug-an si Ravelo nga sayon ra kaayo ang paghikay niini kay gikan sa kopras sa lubi, iniggaling niini aron lanahon, kuhaan lang sa mga hugaw-hugaw ang lana ug ang limpyo nga lana mahimo nang ideretso sa pagtubil sa makinang diesel.

Tungod niini gilauman ni Ravelo nga masulbad na ang krsesis sa diesel dinhi sa nasud tungod ang mahimong "i-substitute" sa sugnod nga gasolina alang sa de gasolinang makina, mao man ang ethanol nga gikan sa tubo nga abunda usab dinhi sa ato.