Laing fratman misurender

Usa sa mga natalang pinangitang sakop sa mga fraternity ang mitahan niadtong milabay'ng gabii diha sa buhatan ni Mayor Tomas Osmeña gumikan sa kahadlok nga mabirahan sa mga vigilante ug aron usab paglimpyo sa iyang pangalan.

Ang mitahan ug mipa-clear sa iyang pangalan mao si Glen Marson, sakop sa Tau Gamma Phi kinsa dunay kasong homicide niadtong Enero 12, 2004 kalabot sa pagkapagan ug pagkapatay sa usa ka panday nga si Eduardo Paradero.

Base sa rekord sa Homicide Section dunay nahitabong panag-engkwentro tali sa grupo sa Tau Gamma Phi ug Akrho niadtong tungura nga gikalambigitan ni Marson, Santos Dela Cruz alyas Sonny dela Cruz, Joven Camajalan, Arestotle Aves alyas Ares ug usa ka alyas Waway.

Si Paradero niadtong tungura gikan pa sa trabaho ug mikabyon sa usa ka PUJ pauli na sa ilang pinuy-anan sa San Fernando dihang kalit nga naigo sa bala dihang nagpinusilay ang mga nahisgutang fratmen.

Matud pa sa amahan ni Marson nga si Reynaldo nabalaka siya sa seguridad sa iyang anak gumikan sa paggula sa pangalan niini diha sa mga sibyaanan ug pamantalaan nga nakapiyansa naman sila sa maong kaso niadtong 2005 og P20,000.

Si Marson giingong adto na magtago sa Bohol apan gumikan sa pagpagawas ni Osmeña og reward aron matultulan ang mga pinangitang fratmen gipabalik kini ni Reynaldo aron malimpyuhan ang pangalan sa iyang anak.

Gimando ni Osmeña kang Supt. Melvin Gayotin nga buhian si Marson human makumbinsir sa gipakitang dokumentos kabahin sa kaso niini nga karon kasamtangan pang nag-ungot sa korte.

Niadtong milabay'ng duha ka semana sukad nga migula ang mga pangalan sa pinangitang fratmen tulo na ka sakop sa Tau Gamma Phi ang mitahan samtang duha usab sa Akrho ang nangadakpan sa operasyong gilusad sa mga sakop sa Cebu City Police Office.