Amahan milugos sa 4-anyos nga anak gikiha na

Nabalhog na sa karsel ug napasakaan og kasong pagpanglugos ang usa ka amahan human kini masikop sa kapolisan sa San Nicolas Police Station pila ka oras human kini miikyas dihang nasakpan sa iyang kapuyo nga milugos sa ilang kwatro anyos nga anak niadtong milabay'ng Martes diha sa barangay Pasil ning dakbayan.

Ang suspek (ngalan gipugngan) gisikop ug gi-turn-over sa asawa niini ngadto kang PO1 Janelle Jungco sa San Nicolas Police Station Womens Desk niadtong milabay'ng gabii.

Si SPO2 Reynaldo Origenes sa San Nicolas Police station miklaro sa Banat News nga wala moikyas ang suspek diha sa ilang panimalay apan nianang pagkagabii inabagan sa mga silingan gipatahan ang suspek.

Ang suspek sa pakighinabi sa mga tigbalita nangangkon nga wala siya makahibalo sa iyang nahimo sa iyang anak, matud pa niya nga samtang nangatulog nakamata siya sa paghilak niini.

Diha nalang siya nakugang dihang gitutukan siya sa iyang asawa kinsa mitawag sa ilang anak palayo kaniya.

Apan ang asawa mitug-an sa mga tigbalita ug kapolisan nga naaktuhan gyud niya ang iyang bana sa gibuhat ngadto sa ilang anak, dihang napagawas niya ang bata gikatahong gibitad siya niini pasulod ug nangayo og pasaylo kay wala siya mahibalo sa iyang gibuhat.

Kasong pagpanglugos ug pag-abuso sa bata ang gipasaka sa asawa niini kagahapon ngadto sa piskalya.