TB, kagid, hubak, hyper sakit sa BBRC

Sakit nga tuberculosis kon TB, kagid, hubak, hypertension, matag-tiki, biri-biri ug hyper-acidity maoy kumon karong mga sakit nga gimulo sa kapin usa ka gatos ka mga bilanggo sa Bagong Buhay Rehabilitation Center.

Si JO2 Lyn Valez ang infirmary nurse sa maong bilanggoan mitug-an sa Banat News nga duna silay 18 ka kaso sa TB, 12 niini grabe ug kinahanglan og mas taas nga panahon aron magpaalim ug ang unom dili kaayo grabe.

Sumala pa ni Valez nga dunay mga piniriso nga nagdala na sa maong sakit dihang nasulod sa BBRC, matud pa nga diha lang kini sagad madiskubrehan kun masulod sa ila kay duna may medical check-up nga himuon.

Samtang ang uban diha na matakdi sa sulod, gani giangkon ni Valez nga bisan ang mga jailguards nangatakdan sa maong sakit gikan sa mga piniriso bisan pa kadto'g wala direktang madestino sa infirmary.

Matud pa ni Valez nga diha nalang mahibaw-an sa mga jailguards nga duna silay TB kung mag-upgrading sila gumikan kay dunay medical check-up apan dili na sila makapadayon sa schooling hangtud nga dili sila maalim.

Gawas sa TB ang sakit nga kagid maoy nagsunod, dunay 40 ka mga bilanggo ang naa niini, sunod ang hyper acidity- 35 ka kaso, hupong kun biri-biri- 10 ka kaso, hubak -walo ug sakit nga hypertension - lima ka kaso, samtang duna say wala matinong gidaghanon sa natugkan og matag tiki.

Matud pa ni Valez nga nakuha ang maong mga sakit ug paspas ang pagkatap gumikan sa kahuot sa maong bilanggoan nga gidesenyo para lang sa 250 ka tawo apan karon duna nay 2,499 ka mga bilanggo.

Usa sa hinungdan mao ang pagpuli-puli og suot sa mga sinina, kakulang sa kaligo, huot nga higdaanan (ang uban wala na gyuy kahigdaan) ug kakulang sa ehersisyo matud pa ni Valez.