Abusadong sakop sa CITOM ipareklamo gyud

Giawhag karon ni City Traffic Office Management Executive director Arnel Tancinco ang publiko sa pagsumbong sa mga abusadong mga traffic enforcers ilabi na kadtong walay mga maayong pamatasan kun manakop sa mga drayber nga makahimo og salaod.

Gipahibalo kini ni Tancinco gumikan kay sa miaging tuig dunay ilang mga sakop nga gipangtaktak sa serbisyo tungod sa kadaghan sa mga reklamo ug pagka - arogante nila kun manakop og drayber.

Samtang gipahibalo ni Tancinco nga duna na unya'y bag-ong uniporme nga suoton ang mga traffic enforcers sugod sa Pebrero 24, atol nga ang dakbayan sa Sugbo magsaulog sa ika-69 nga Charter day.

Matud pa niya ang pagbag-o nila og uniporme sa ilang mga sakop magpasabot usab nga palambuon nila ang serbisyo sa ilang mga traffic enforcers.

Hinuon,dili kaayo layo ang kalainan sa bag-ong uniporme sa karon sa bag-ong kausaban kay ang mga sakop sa Citom magsul-ob na g'yod og kawo nga maoy makahatag kanila og dugang kaangayan tan-awon ingon man depensa sa init sa adlaw ug uwan.