P100T sa Kano nasakiyo

Usa ka Amerikano ang midangop sa Pardo Police Station human kini mawagtangi og bag nga may sulod nga P100,000 uban sa mga importanteng dokumentos dihang giablihan ang compartment sa taxi nga iyang gisakyan kagahapon sa kaadlawon.

Ang biktima giilang si Lyle Cheers, hingkod ang panuigon kinsa temporaryong nagpuyo sa barangay Lagtang dakbayan sa Talisay uban sa usa ka Leah Myers molupyo usab sa maong barangay.

Matud pa sa mga biktima nga luwan sila sa usa ka taxi nga gimaneho ni Odie Entienza gikan sa Lagtang padulong unta sa dakbayan sa Sugbu ug ang iyang bagahe diha gibutang sa baggage compartment.

Apan pag-abot nila sa may utlanan sa dakbayan sa Sugbu diha sa dalan Natalio Bacalso namatikdan nilang abli na ang compartment maong gipahunong nila ang taxi aron pagsusi apan mao nalay kakurat nila wala na diha ang maong bag.

Sulod sa maong bag ang mga importanteng dokumentos, passport, mga credit cards ug ang P100,000 nga cash.