Pamunggot og ulo wa pa masulbad sa Pinamungajan

Gibasol sa kapolisan ang katawhan sa Pinamungjan gumikan sa kawalay kooperasyon niini hinungdan nga hangtod karon wa gyud masulbad ang kaso sa gipunggotan og ulo nga mag-uuma sa bukirang bahin sa lungsod.

Matud pa ni PO2 Dominique-Pantajo, desk officer sa Pinamungajan Station nga usa ka semana, human patya si Isabelo Tanlong, 66, biyudo, niadtong Domingo didto sa iyang balay sa sitio Luy-a, Lamak, Pinamungajan, wa gyuy nakatug-an sa nagpatay niini.

Sumala sa kapolisan nga nagkawilkawil ang ulo sa biktima kansang liog gigutlab sa hait nga hinagiban, gitabas ang dughan ug giputlan og kamot hinungdan sa hinanaling kamatayon niini.

Matud pa ni Pantajo nga bugtong apo nga 3 anyos ra sa biktima maoy nakasaksi sa maong hitabo dihang giihaw sa wala hiilhing tawo o mga tawo ang iyang apohan sa mga alas 7:10 sa kabuntagon niadtong Pebrero 5.

Ang Luy-a may labing layo nga sitio sa kabukiran sa Pinamungajan diin layo usab kaayo og silingan ang biktima.

Wala usay mga timailhang gitulis ang biktima kay wala may nangahanaw sa iyang mga butang sulod sa panimalay matud pa sa kapolisan.

May katahap sila nga basin may nagdumot sa tiguwang hinungdan nga gipahimuslan ang higayon sa pagpatay kaniya.

Apan kining tanan pulos lamang mga tiyoria tungod sa pagkakuwang og mga testigos.

Ang kapolisan nagkanayon nga gawas lamang kon may mga tawong mokooperar kanila, masulbad nila ang maong hitabo, matud pa ni Pantajo.