Hubog mipusil sa Aikidoka na-ospital

Gidemalas ang usa ka hubog nga armado og pugakhang dihang gidul-itan og pusil sa ulo ang usa ka gikatahong instructor sa Aikido kinsa bisan samaran nakahimo pa pagdis-arma kaniya nga miresulta hinuon sa pagkalandig sa suspek sa tambalanan.

Ang biktima giilang si Arnel Ruiz, 24, molupyo sa dalan Osmeña barangay Sta. Cruz ning dakbayan ug gikatahong nagtudlo og Aikido sa usa sa mga martial arts school dinhi sa dakbayan.

Apan mas grabe pa ang bun-og nga nahiaguman sa suspek nga si Lito Mabuting, 26, construction worker, sa kasamtangang gi-construct nga Osmeña tower diha sa dalan Osmeña sa barangay Sta. Cruz.

Sumala pa sa imbestigasyon sa Homicide Section ang biktimang si Ruiz kasamtangang nakig-inom sa mga higala sa usa sa mga imnanan diha sa dalan Osmeña.

Diha sa pikas lamesa namatikdan niini si Mabuting nga nagbarag-barag na sa kahubog nga miduol sa cashier.

Hinungdan nga giduol kini ni Ruiz ug gibadlong ug gipapauli kay daghan na kini og nainom. Matud pa nga ang suspek namatikdang nasuko apan mibiya gihapon sa maong imnanan.

Dangtan pila ka minutos mipauli na si Ruiz apan paggawas palang niini kalit siyang gibabagan sa suspek ug dayong tion og pusil sa pugakhang diha sa ulo sa biktima.

Matud pa nga nakalihay og dyutay si Ruiz maong wala masawod sa iyang nawong ang mga bolitas sanglit mitapsing lang kini hinungdan nga gilayog niya ang suspek ug gidisarmahan.

Ang biktima daling gihatud sa Cebu Doctors Hospital samtang ang suspek milandig usab sa Cebu City Medical Center gumikan sa pagkabun-og ug gituohang dunay mga bukog nga nangabali sa kalawasan niini.

Ang pugakhang sa suspek gitahan ni Ruiz ngadto nila ni PO1 Redentor Vaño.