Pag-umangkon sa konsehal nakapusil

Patay nga nadangat sa tambalanan ang usa ka 23 anyos nga lalaki kinsa nakaangkon og usa ka samad pinusilan sa iyang dughan kagahapon sa kaadlawon diha sa ubos sa fly over sa Barangay Tabunok dakbayan sa Talisay.

Si Samuel Alferez, residente sa nahisgutang barangay daling gidala sa Cebu City Medical Center niining dakbayan apan gideklara kini sa doktor nga patay na nga naabot sa tambalanan.

Ang suspetsado sa pagpamusil giilang si Wilbur Bas hingkod ang panuigon taga Barangay Dumlog sa maong siyudad giingong pag-umangkon ni konsehal Arturo Bas daling miikyas sakay sa Honda civic nga auto nga nagtangag sa plakang UCY- 591.

Base sa imbestigasyon sa kapolisan sa Talisay, si Alferez naglakaw uban sa iyang asawa diha sa lugar nga nahitabo ang insidente kalit nga giduol ni Bas ug gipusil sa walay pangutana dayong ikyas.

Ang kapolisan mipahigayon og follow-up sa maong hitabo.