Taksi drayber naghikog

Namatay ang usa ka taksi drayber nga gituohang naghikog pinaagi sa pagpusil sa kaugalingon sa atubangan sa gikapuyo niining hinigugma.

Nahitabo ang paghikog sulod sa lawak sa panimalay nga ilang giabangan nga nahimutang sa dalan M. L. Quezon, barangay Cabancalan, siyudad sa Mandaue.

Ang biktima nga si Hirudel Comiso, 39 anyos, minyo, lumad nga taga barangay Casili sa lungsod sa Consolacion ug nag-abang og lawak uban sa hinigugma niini sa Mandaue.

Si SPO3 Gil Roco, imbestigador sa Presinto 4 sa Casuntingan Police Station sa MCPO nga gikahinabi sa Banat News ang miila sa kapuyo sa biktima nga si Lorily Teleron, alyas Lovely, hingkod ang panuigon kinsa na-shock ug gidala sa tambalanan.

Matud pa ni SPO3 Roco nga bulag sa legal nga asawa ug may mga anak ang biktima.

Dugang pa niya nga ang armas sa biktima nga kalibre 357 nga maoy giingong gigamit sa pagpusil sa tuong tampihak niini ang ilang napalgan diha sa duol sa biktima nga nagbuy-od.

Sumala pa ni Roco nga ilang gisusi karon kon naglambigit ba sa relasyon sa biktima ug sa hinigugma o sa pamilya ang hinungdan sa paghikog niini.

Si Rowena Mahilom, hingkod ang panuigon nga silingan sa biktima miasoy kang SPO3 Roco nga ilang namatikdan ang biktima ug ang kapuyo niini naglalis ug maoy ilang nabati ang lanog nga boto sa armas ug dihang ilang gisusi maoy ilang nakita nga nagkadugo na ang biktima.

Si SPO3 Roco miingon nga ilang gipaubos sa awtopsiya ang patay'ng lawas sa biktima pagsuta kon may foul play ba ang kamatayon niini.