Lima gipangita tungod sa kaso sa drugas

Hingpit gayod nga gipalig-on ang kaso nga gipasaka sa korte nga kalapasan sa Republic Act 9165 kun Comprehensive Dangerous Drug Act of 2002 batok sa lima ka mga tawo.

Ang gipasakaan og kaso mao sila si Samson Alinsug, 36, Rolando Suson, 30, Marvin Manatad, 31, Belton Cabahug, 29 ug Ola Gitgano kinsa padayon karon nga gipangita.

Ang team sa vice squad section sa Mandaue City Police Office (MCPO) maoy nagpasaka sa maong kaso ngadto sa korte ug gipresintar usab ang 34 ka pakete nga shabu, duha ka Hongkong dollar nga kuwarta, tinfoil, lighter ug tooter isip ebidensiya.

Dugang nga gipresintar sa kapolisan ang P900,00 nga salapi nga lakip sa nasakmit nga gituohang halin sa maong ilegal nga negosyo.

Ang buy bust operation sa mga sakop sa vice squad section sa MCPO ang natigayon niadtong miaging gabii sa Zone Ube sa barangay Paknaan sa maong dakbayan.

Ang kauban sa maong mga suspetsado nga si Gitgano ang nakamatikod nga polis ang ilang nahimong kustomer nga maoy hinungdan nga dali kining nakadagan pahilayo.