19 anyos nakuhaan armas sa checkpoint

Ang kapolisan sa dakbayan sa Lapu-Lapu ang nagpadayon karon sa higpit nilang pakisusi sa pagkatawo sa usa ka 19 anyos nga lalaki nga nakuhaan og armas sa checkpoint nga ilang gihimo ug kon nalambigit ba usab kini sa pagpanulis og pasahero sa PUJ.

Ang nadakpan mao si Ronald Bonayog, lumad nga taga Zamboanga del Sur ug temporaryong nagpuyo sa barangay Labogon, siyudad sa Mandaue.

Ang team ni PO2 Ereneo Hermosa ang nagpahigayon og checkpoint sa 1st Mactan Mandaue Bridge sa habig sa barangay Pajo sa maong siyudad ug luwan ang suspetsado sa multicab nga pasaheroan gikan sa dakbayan sa Mandaue.

Matud ni SPO3 Danny Tampus nga gikahinabi sa Banat News nga ang suspetsado maoy usa sa gipakanaug nila ni PO2 Hermosa nga pasahero sa multicab sa paglabay niini checkpoint sa maong dapit.

Dugang pa niya nga nasigpatan nila ni Hermosa nga may nagbagal sa hawak niini ug sa ilang pagrikisa maoy nasuta nga armas nga kalibre 357 ug may buhing bala ang giloklok niini.

Sumala pa ni SPO3 Tampus nga ilang gipangayoan ang suspetsado og mga papeles nga maoy momatuod nga legal ang pagdala niini og armas apan napakyas kini sa pagpakita ngadto kanila nga maoy hinungdan nga ila kining gidakop.

Si SPO3 Tampus miingon nga ang dinakpan nga gitanggong karon sa bilanggoan ang mag-atubang og kaso nga kalapasan sa Republic Act 8294 kun paghupot og armas nga walay lisensiya.