Tomas naglaum daghang fratmen mosurender na

Malaumon si mayor Tomas Osmeña nga duna pay laing mga wanted nga sakop sa lainlaing fraternities ang boluntaryong motahan sa ilang kaugalingon sa kapolisan karong mosunod nga mga adlaw karun nga duna nay pipila ka mga kaubanan niining wanted ang mitahan na sa ilang kaugalingon.

Gipasigarbo sa mayor nga dako og gikatampo ang gipatuman niyang reward system nga maoy nakadasig sa mga suspetsado nga motahan na lang sa kaugalingon tungod sa kabalaka nga dunay mag-interes kanila og sumbong sa kapolisan ilabi na karon nga dunay linibo ka pesos nga gipatong nga ganti sa ilang ulo.

Bisan pa man og boluntaryong mitahan ang sakop sa Tau Gamma Phi nga si Glenn Codiñera kagahapong adlawa apan gipasalig sa mayor nga ihatag gihapon niya ang P100 mil nga ganti niini aron madasig pa gyud ang ubang mga informant.

Hinuon ang makadawat sa maong ganti mao ang inahan ni Codinera og P25 mil gumikan kay mao kini nakig-alayon sa kapolisan aron mosurender ug ang sobra niini bahin bahinon sa mga polis nga nakasikop apil na ang usa ka barangay kagawad sa Tejero, Jessilo Dungog nga mitabang sa pagpasurender sa suspek.

Wala una itug-an sa mayor ang pangalan sa lain pang suspek nga sakop sa fraternity nga nagplano karong mosurender.

Bisan si Cebu City Police Office (CCPO) chief Supt. Melvin Gayutin mikonpirmar nga nakadawat sila og report kabahin sa lain pang wanted nga sakop sa fraternity nga nagtinguha nga mosurender.

Nunot niini, nanawagan si Gayotin ngadto sa nahabiling pang mga kriminal nga sakop sa lain laing fraternities nga motahan na lang sa ilang kaugalingon ug atubangon ang mga salaod niining nahimo o ba kaha pamatud-an sa korte nga dili sila kriminal kun ugaling inosente kini sa mga kasong ilang gi-atubang.