Illegal fishers sa Talisay gibasol

Gibasol sa hepe sa Bantay Dagat sa Cebu City ang mga ilegal nga panagat sa Talisay City nga maoy nakapuo sa mga isda niini hinungdan nga mangayaw nalang og panagat ang ilang mga mananagat.

Si Komisyoner ug Director Elpidio "Jojo" dela Victoria sa Bantay Dagat Commission sa Cebu City mibutyag niini human hidakpi ang walo ka mga mananagat nga taga Talisay niadtong miaging adlaw.

Ang maong mga nadakpan nga didto na managat sa kadagatang iya sa Cebu City, pulos migamit og pukot nga pino og mata nga gidili sa balaod.

Dihang gisukit ni dela Victoria ang maong mga mananagat mibutyag kini nga wala na gyuy isda ang ilawom sa kadagatan sa Talisay hinungdan nga tua sila sa kasikbit nga kadagatan moladlad sa ilang pukot.

Apan matud pa ni dela Victoria nga ang nakasawot pag-ayo sa isda sa kadagatan sa Talisay mao ang dinamita, mga pinog mata nga pukot, ug cyanide.

Kini nunot usab sa wala kaayo bantayi pag-ayo sa mga tinugyanan sa Bantay Dagat sa maong dakbayan ang mga mananagat nga mogamit og ilegal nga panagat.

Alang kang dela Victoria nga panahon na usab nga makat-on ang maong mga mananagat aron nga dili sila mogamit og panagat nga supak sa balaod.