Consultant sa CH para BBRC gitaktak ni Tomas

Gitaktak ni Mayor Tomas Osmeña ang consultant sa siyudad sa Sugbo nga gitahasan pagmonitor sa operasyon sa Bagong Buhay Rehabilitation Center (BBRC), samtang mipasalig ang bag-ong natudlong jail warden nga "back to basics" ang mga guwardiya aron madisiplina.

Gipahibalo sa mayor ang pagtaktak kang Atty. Gregorio Bacolod isip consultant sa oversight committee sa maong bilanggoan gumikan kay wala gihapoy nahimo ang maong komitiba pagsumpo sa lapad nga kurapsyon sa BBRC.

Katuyoan unta sa oversight committee aron maniid ug moduso og mga rekomendasyon aron makurihian ang operasyon sa maong bilanggoan.

Apan wala gihapon kini nahimo gumikan kay nakita ni Osmeña nga bisan mismo ang mga jail personnel sa BBRC ug ang kadagkuan sa Bureau of Jail Management and Penology (BJMP) nagdumili man pag-kooperar sa mga programang ipatuman sa siyudad.

Samtang si Chief Inspector Efren Nemeño kinsa niadtong Miyerkules sa hapon mihulip sa puwesto ni Supt. Teofilo Labating gumikan sa maong kontrobersya misaad nga pabalikon sa "uno" ang mga jailguards.

Si Nemeño mibutyag nga disiplinahon ang mga jailguards sa BBRC gumikan kay usa kini sa nakitang hinungdan nganong dunay mga anomalyang nanghitabo sa maong bilanggoan.

Dugang pa niini misaad si Nemeño nga molusad og mga programa diha sa maong bilanggoan aron dunay pangabuhian diha sa sulod samtang nagserbisyo sa ilang mga silot.

Tulo na ka adlaw ang nakalabay nasikop sa entrapment operation sa NBI-7 ang duha ka mga jailguards nga sila si JO1 Evette Sy ug JO1 Mencho Landeros nga nasakpan sa akto nga nangilkil ngadto sa mga food vendors nga namaligya sa maong bilanggoan.

Sa unang pamahayag mitug-an ang duha nga igo ra silang misunod sa kamandoan sa ilang labaw, apan niadtong Miyerkules ila kining gibakwi ug miingon na usab nga ilang kabubut-on ang pagpangolekta aron makatigum og dugang pundo.

Apan si Bise Mayor Michael Rama dili motuo sa pagbawi sa duha gumikan kay matud pa niya nga posibleng napugos lang ang duha sa pagbakwi niini.