Upat nasikop atol sa drug-bust

Gibalhog sa bilanggoan ang upat ka mga tawo nga nadakpan human sa ginukdanay atol sa buy bust operation nga gihimo sa kapolisan didto sa Zone Ube, barangay Paknaan, siyudad sa Mandaue niadtong miaging gabii.

Ang nadakpan mao si Samson Alinsug, 30, Marvin Manatad, 31, Rolando Suson, 30 ug Bilton Cabahug, hingkod ang panuigon nga pulos nagpuyo sa nahisgotang dapit.

Ang team sa Vice Squad Section ug Anti Illegal Drug Team sa Mandaue City Police Office (MCPO) maoy nakasikop sa mga suspetsado kinsa nakuhaan kini og mga pinaketeng shabu nga wala matino ang gibug-aton ug mga kahimanan sa paggamit niini.

Si PO3 Allan Alinsunod ug mga kauban ang mihimo na sa ilang surveillance ug monitoring sa nahisgotang lugar, ilang nasuta nga positibo ang pagpayuhot og shabu sa mga suspetsado.

Dihang ilang gihimo ang pagpalit og shabu pinaagi sa ilang kauban niini nga maoy gihimong police decoy si Alinsug ug mga kauban nga nakamatikod mikaratil og dagan.

Ang mga suspetsado nga nanagan sa pagsulod sa ilang panimalay nakuhaan usab og mga drogas uban sa drug paraphernalia.