Mga bata gipanghuboan dayon gikuhaan og video

Pito ka bata ang giluwas sa kapolisan sa Carbon Police Station human giingong dunay tulo ka tawo ang mipahubo sa mga bata ug mikuha og video niadtong Martes sa gabii diha sa luyong bahin sa Unit 2 Carbon Market.

Sumala pa ni SPO4 Rica Aying sa Carbon Police station sa pakighinabi sa Banat News dunay misumbong sa ilang buhatan kabahin sa tulo ka tawong (mga ngalan gipugngan sanglit wala pay pormal nga kasong gisang-at,duha kanila mga babaye) nga mikuha sa video sa mga bata.

Gikatahong gipanghuboan ang mga bata dihang gihimo kini apan wala makakumpirmar si Aying sa maong taho.

Apan dihang girespondehan nila ni SPO4 Jose Gesto, SPO1 Julius Umpad ug SPO2 Eugenio Teves ang dapit diin gikataho ang insidente wala na didto ang mga suspek.

Ang mga bata uban sa ilang mga ginikanan gipadala ngadto sa Family Gender, Juvenile Sensitivity Section alang sa imbestigasyon.

Apan si Supt. Norma Corbo hepe sa maong buhatan sa pakighinabi sa Banat News sa telepono mitug-an nga wala pa siya makadawat og report gikan sa mga imbestigador niini gani matud pa niya wala pa kini mabutang sa ilang blotter.

Hinuon gibutyag ni Corbo nga kung dunay ginikanan ang mga biktima ila gyud kining papaulion uban sa mga ginikanan kun masuta nilang walay peligrong nagpaabot sa mga biktima diha sa ilang panimalay.