Tining gi-depensahan

Gidepensahan sa mga higala si Bogo Mayor Celestino "Tining" Martinez III gikan sa mga pasangil nga nalambigit kini sa pagtulis sa Landbank of the Philippines sa lungsod sa Bogo.

"We felt that Mayor Tining has been very industrious as far as taking care of his town is concerned," nagkanayun si Jose Mari Miranda, ang pangulo sa Bogo-Medellin Sugarcane Planters' Association sa usa ka press conference nga iyang gipatawag uban sa iyang mga sakop kagahapon.

Matud pa ni Miranda nga sports-minded nga pagkatawo si Martinez isip usa ka athletic nga tawo.

Palabyanan sa oras ni Martinez kon walay trabaho mao ang bodybuilding ug paugnat sa kusog ug wala sila nakadungog nga may dautan kining binuhatan sa iyang pagkabatan-on sa ikaupat nga distrito sumala pa ni Miranda.

Samtang gibasol ni Miranda ang mga awtoridad sa pagdugay-dugay pagdakop sa utok sa tulis sa bangko ug gigamit lang ang suspek nga si Joel Sumabong aron pagduhig sa pangalan ni Martinez.

Nahibulong si Miranda ug kaubanan nga kapin na sa lima ka buwan sukad nahitabo ang tulis, wala pa gihapon masikop sa kapolisan ang tinud-anay nga utok sa tulis.

Dili usab motoo si San Remegio Mayor Mariano Martinez nga gub-on sa iyang pag-umangkon nga si Tining ang iyang kadungganan.

Gipasabot usab ni Bokal Joven Mondigo, alalay sa mga Martinez sa ikaupat nga distrito, nga may kaya ang pamilya sa batan-ong mayor ug makagasto kini sa iyang mga gikinahanglan.

Matud pa ni Mondigo nga ilado usab si Martinez sa ubang lugar sa nasud isip sakop sa liga sa mga mayor.

Nunot niini gipahibawo ni Miranda nga hayan may luwatan nga opisyal nga baruganan ang ilang grupo.

Giklaro ni Miranda nga wala masayud si Martinez sa ilang mga plano sanglit wala sila magkaestoryahanay sa pamilya niini.

Samtang nalipay usab si Miranda nga naglikay si Sr. Supt. Vicente Loot, hepe sa kapolisan sa lalawigan sa Sugbo, nga manginlabot sa kaso ilabi na nga nagkaaway ang iyang asawa nga si Daanbantayan Mayor Maria Luisa Loot ug ang mga Martinez sa ikaupat nga distrito.

Apan iyang gipadayag nga walay politika ang ilang pagpadangat sa suporta alang kang Martinez sanglit dili politikal ang ilang grupo.

Si Sumabong unang nagpakatap og mga video footages ug print-out sa mga text messages nga giingong gikan ni Martinez mahitungod sa nahitabong tulis.

Si Sumabong kinsa nitahan sa iyang kaugalingon ngadto sa kapolisan nipadayag nga wala na siya kaagwanta sa gihimo sa mga Martinez hinungdan nga napugos na siya sa pagtug-an sa mga ilegal nga kalihukan niini.

Kapin sa P10-milyones ang nakuha atol sa tulis sa LBP-Bogo sa niaging tuig ug gilambigit ang pangan sa batan-ong mayor nga apil sa maong krimin.

Si Sumabong anaa na sa Criminal Intelligence and Detection Group 7 nga mao na ang mokupot sa kaso human ni-inhibit si Loot gumikan sa kalambigitan sa politika sa maong kaso.