ASEAN summit 2007 kahatag trabaho

Ang pagpahigayon sa Asean summit dinhi sa dakbayan sa Sugbo karong bulan sa Disyembre makahatag og daghang kaayuhan sa mga lumolupyo sa dakbayan tungod kay mapugos ang mga opisyal sa kagamhanan sa paghimo'g daghang mga proyekto.

Unang himuon sa kadagkoan sa dakbayan mao ang pagpanindot sa mga karsada ug duna pa gani'y mga gihan-ay nga beautification project diha sa SRP nga nahimutangan sa kanhi Kawit Island.

Tulo ka konsehal nga sila si Nestor Archival, Arsenio Pacaña ug Gabriel Leyson nagkahugpong sa pagpalabang og resolusyon nga mag-awhag pagpangayo og gahin og P700 mil aron gastuhon paghimo og "artificial hill" kon gamay'ng bungtod diha sa Kawit Park.

Ang Parks and Playground Commission, usa ka departamento sa City Hall, maoy tugyanan sa paghimo sa maong "artificial hill" diha sa Kawit Park.

Gipasabot sa tulo ka konsehal nga ang pagbutang og artificial hill diha sa Kawit Park nga sakop sa SRP gitumong aron sa pagdugang sa kanindot sa maong dapit sa tumong nga makadani kini og mga turista ingon man mga magpapatigayon.

Ang mga pamuno sa labing minus 17 ka nasud nga sakop sa Association of Southeast Asian Nations, gipaabot nga moanhi sa Sugbo karong Disyembre alang sa maong summit.

Ang Sugbo maoy napilian nga mo-host sa maong international event hinungdan nga gisugdan na karon ni Mayor Tomas Osmeña ang paghimo og mga pagpangandam.

Ang gamay'ng bungtod nga himuon diha sa SRP nagkantidad og P695 mil nga maglakip sa mga tanom, labor ug sa mga materials.

Samtang ang laing buot ipatuman sa kadagkuan sa dakbayan mao ang pagdili sa pagpataka og panghayhay sa mga sapot ug ubang panapton diha daplin sa karsada kun magsingabot na ang Asean summit.

Si Engr. Dionesio Gualisa, ang hepe sa Department of Public Services, namahayag nga maoy usa sa iyang proyekto ang pagpaanindot usab sa kadalanan.

Gimando na ni Osmeña ang pagpangayo sa mga gubaong karsada ug pagpamintal sa mga public structures.