Air force nahulog sa helicopter

Usa ka sakop sa Philippine Air Force (PAF) sa siyudad sa Lapu-Lapu ang namatay human kini matagak gikan sa Sikorsky helicopter dihang nabugto ang pisi atol sa ilang jump training sa gitas-on nga 50 ka tiil sulod sa Mactan Benito Ebuen Airbase niadtong Martes sa hapon.

Ang namatay mao si Staff Sgt. Joseph Mallorca Achas, hingkod ang panuigon nga nagpuyo sa Greenfield Village sa barangay Pajo sa siyudad sa Lapu-Lapu ug sakop sa 5052nd Search And Rescue sa PAF.

Si Lt. Eures Montejo ang tigpamaba sa MBEAB mitug-an sa Banat News nga si Achas usa ka master jumper sa SAR, siya maoy nangulo sa team two sa mga rescuers niadtong tungura atol sa ilang praktis.

Sumala pa ni Montejo kasamtangang nagpahigayon og 'operational check' ang pilotong si Capt. Ramon Dioso sa Sikorsky ug gidungan usab ang 'heli-rapel proficiency' sa ilang grupo niadtong tungura .

Dugang pa ni Montejo nga bag-o pa ang maong pisi apan ang kalit nga paglabyog sa helikopter gumikan sa gituohang bul-og sa hangin maoy nakaingon nga nainat kini pag-ayo ug nabugto samtang nagkumpayot pa si Achas.

"The sudden down wash of the aircraft might have exceeded the tensil strength of the rope plus the momentum and weight of the rapeller causing it to break," asoy pang Montejo base usab sa gisumitir nga accidental report sa 5052nd SAR.

Giklaro ni Montejo nga bag-o pa ang maong pisi ug gi-double check pa kini sa grupo una pa gihimo ang maong training pagka-alas 3 sa hapon diha mismo sa ilang base.

Unang mitugpa ang likod ni Achas nga nakaingon sa grabeng kadaut sa iyang kalawasan, gisuwayan unta og dala sa Benito Ebuen General Hospital ang biktima apan dangtan pila ka gutlo nakabsan kini sa kinabuhi.

Gidala ang patay'ng lawas sa biktima sa Rolling Hills sa dalan A.S. Fortuna sa Banilad, siyudad sa Mandaue ug gipaubos kini sa autopsy diin nasutang nadaut ang liog, tiyan ug dughan sa biktima.

Ang tigpamaba sa Philippine Air Force nga si Colonel Restituto Padilla mitug-an nga dunay imbestigasyon nga himuon kabahin sa insidente.

Ang 5052nd SAR maoy nag-unang rescue unit dinhi sa Kabisay-an nga moresponde sa mga katalagman ug trahedya. - Uban sa taho ni Romeo Limpangog