Sumabong nagmahay sa gibuhat

Mipadayag si Joel Sumabong sa iyang pagmahay sa gidangatan nga naingon niini ang iyang kinabuhi nga matud pa niya "gigamit" ra sa mga impluwensyadong tawo dihang gikahinabi kini sa mga sakop sa media diha sa buhatan sa Criminal Investigation and Detection Group 7 kagahapon.

Si Sumabong mao ang "whistle blower" nga milambigit sa pangalan ni Bogo Mayor Celestino "Tining" Martinez III nga maoy utok sa Land Bank -Bogo bank-rob ug uban pa usab nga mga pasangil nga dunay kalambigitan ang mayor sa mga wala masulbad nga krimen sa maong lungsod.

Sa pakighinabi kang Sumabong sa Banat News kini mitug-an nga nakapabalaka kaniya mao ang impormasyong nadawat nga ipahipos siya sa mayor susama sa gipanghimo ngadto sa iyang mga kaubanan nga gipamatay ug hangtud karon wala pa masulbad ang kaso.

"Bahala lang unta to og ila kong pasagdan nga mapriso, bahala lang unta 'to nga ila kong i-deny okey ra nako, ang dili nako madawat kanang ila kong ipapatay, ang nakapait sa ako rang mga kauban," asoy pang Sumabong.

Matud pa niya nga niadtong gipatay si Felix Cuerda diha sa dalan Borromeo niadtong tuig 2003 siya maoy nihulip isip pangulo sa gitawag og "Mayor's Squad" isip protektor sa mayor batok sa mga kalaban niini.

Giangkon usab niya nga gawas sa pagprotehir kang Tining ang "Mayor's Squad" modawat usab og mga trabahong gun for hire ug ang mopahibalo kanila sa operasyon mao si Digoy Mayol

Samtang si Chief Inspector Patrick Vaño sa Criminal Investigation and Detection Group 7 sa pakighinabi sa Banat News nagkanayon nga ilang ipresentar si Sumabong ngadto sa sala ni Judge Antonio Marigomen sa Branch 61 sa Bogo ug posibleng mabalhog sa karsel sa Cebu Provincial Detention and Rehabilitation Center ang suspek kun dili kini makapiyansa.

Sumala pang Vaño nga ilang sutaon kun mahimo bang magamit nga state witness si Sumabong ug mapailawom sa witness protection program sa Department of Justice.

Si Sumabong mihimakak sa pangangkon ni Celestino "Junie" Martinez diha sa interbyu sa DyAB nga gumikan sa anak ni Sumabong nga usa ka "special child" miduol kini sa mayor aron magpatabang.

Matud pa ni Sumabong nga nagkaila sila ni Tining gumikan sa uyuan sa iyang asawa nga si Felix Cuerda kinsa matud pa niya kaniadto maoy bata-bata sa mayor, matud pa niya nga tungod sa iyang kahanas sa armas ug kasinatian sa kalihukan sa rebelde sukad niadtong 1986 maong nahimo siyang sakop sa "Mayor's Squad" niadtong 2001.