Tribu Basakanon ipadala sa kauluhan

Gitakdang mopadala og contingent ang kagamhanan sa dakbayan sa Sugbo ngadto sa kaulohan sa himoong Aliwan Festival didto sa Intramuros,Manila.

Kini human gitugutan ni mayor Tomas Osmeña ang Tribu Lumad Basakanon, sa Basak San Nicolas nga maoy mag-representar sa siyudad sa Sugbo sa pagahimoon nga Aliwan Festival nga susama sa kalihukan sa Sinulog Mardigras.

Nitugot si Osmeña nga makasalmot ang Tribu Basakanon nga gilangkoban sa mga kabataan nga sagad mga tinun-an sa sekondarya ug elementarya gumikan kay ipahigayon man ang maong festival unya sa bulan sa Abril nga bakasyon na sa klase.

Apan kadto lang mga kalihukan nga ma-atol sa mga bulan nga sirado na ang klase ang tugotan sa mayor nga makapadala og mga contingent.

Nasayran nga ang Tribu Basakanon duha na kini ka tuig nga nahimong kampyon sa Sinulog Mardigras gawas lang karung tuiga gumikan sa deduction sa ilang nakuha nga puntos tungod sa paglapas niini sa kretiriya sama sa pagamit og dagkong ligid sa props niini.

Gani ang Tribu Basakanon mao kini ang nahimong kampyon sa bag-o lang natapos nga Sinulog didto sa lungsod sa Carmen, Cebu.