Ang mga biktima giilang sila si Danilo Carticiano, 39, ug asawa niining si Apolonia ,46, kinsa nabulit og samad pinusilan sa ulo ug kalawasan samtang nakadagan apan nakaagum og daghang pangos sa kalawasan ang ilang anak nga si Michael, 20.
Gitumbok ni Michael nga mibanhig kanila mao si Tomas Vargas, ang ilang silingang dugay'ng gikabangi sa iyang amahan gumikan sa panag-ilog sa yutang ilang giuma.Ang suspek daling miikyas human sa hitabo.
Sumala pa ni SPO2 Francisco Leornas sa pakighinabi sa Banat News nga si Michael maoy nagmaneho sa ilang motorsiklo ug angkas ang iyang inahan ug amahan padulong sa Mantalongon-Proper aron pag-adto sa tabo.
Giingong pipila ka gutlo gikan paggawas nila sa ilang tugkaran kalit lang nga nabalitok si Michael ug nauban og katumba ang motorsiklo ug ginikanan niini, duna diay alambreng gituyo og babag diha sa karsada nga mibitik kanila nga nagluwan sa motorsiklo.
Nianang pagkabalintong kalit mitumaw si Vargas gikan sa kalibunan ug gipamusil ang managtiayon makadaghang higayon bisan naghigda na sa dalan ang duha samtang si Michael girakrakan usab apan wala maigo kay mikaratel kini og dagan.
Dugang pa ni SPO2 Leornas nga panimalos maoy motibo sa pagpatay sanglit ang lalaking Carticiano maoy suspek sa pagpatay sa anak sa suspek gumikan sa panaglalis sa yuta pila na ka tuig ang nakalabay apan ang maong kaso wala molahutay sa korte.
Nasayran usab nga pipila na ka bulan ang nakalabay gisuwayan na og pusil sa suspek ang biktimang si Carticiano apan wala kini makaigo maong gikiha siya niini nga nakaingon sa pagtago-tago na ni Vargas sanglit gikatahong dunay warrant of arrest batok kaniya.
Gidudahang kalibre 9 mm nga armas gikan sa pistola o ba kaha sa Ingram ang gigamit nga armas sa pagpamanhig gumikan sa kadaghan sa samad nga naangkon sa managtiayon. Apan tulo ra ka basiyo niini ang narekober diha sa crime scene gumikan kay daghan ang mga tawo nga nangusyoso sa lugar.