Panadero 'mimolestiya' sa 6 anyos arestado

Arestado ang usa ka delivery man sa usa ka panaderuhan human kini maabting mimolestiya sa usa ka 6 anyos nga bata nga babaye ilawom sa ikaduhang taytayan sa Mactan-Mandaue Bridge niadtong Sabado sa kaadlawon.

Giila ang suspek mao si Aladino Angawanon, 40, minyo ug lumad nga taga Tabuelan ug kasamtangang nagpuyo diha sa Sitio Agbati barangay Paknaan dakbayan sa Mandaue.

Sumala pa sa imbestigasyon sa kapolisan ang biktima uban sa iyang ig-agaw dihang naagian sa suspek diha sa barangay Pusok sa samang dakbayan ug pugsanon kining gikarga diha sa basket nga sudlanan sa mga pan sa iyang bisekleta nga iyang gipanghatud.

Ang ig-agaw sa bata maoy mitug-an sa inahan sa bata nga gidala sa taytayan ang biktima apan dihang gisubay nila ni SPO2 Roberto Saldon ug PO2 William Jomoc sa unang taytayan wala diha ang suspek ug ang bata.

Diha ilawom sa ikaduhang taytayan naabtan sa mga polis si Angawanon nga kasamtangang naghawok-hawok sa bata hinungdan nga giaresto siya ug gibalhog sa karsel.