23-anyos gipusil sa Trihedron

Kritikal ang kahimtang sa usa ka 23-anyos nga lalaki human kini pusila sa tulo ka gikatahong sakop sa Trihedron fraternity kagahapon sa kaadlawon diha sa Sityo Oregano Barangay Lawaan 2 dakbayan sa Talisay.

Si Camelo Villaver, residente sa maong lugar nagtrabaho diha sa ilang silingan isip usa ka delivery boy og mga seafood ngadto sa mga hotel niining dakbayan, nakaangkon og samad pinusilan sa ulo, liog, kamot ug walang bukton daling gidala sa Talisay District Hospital apan gibalhin kini diha sa Vicente Sotto Memorial Medical Center niining dakbayan.

Dali nga miikyas sila si Fernan Delima, Dexter Empuerto ug ang kauban nilang nailhan lang sa ngalang "Opaw," ang tulo pulos hingkod ang panuigon mga residente usab sa lugar ug gikatahong mga miyembro sa nahisgutang fraternity.

Gibutyag kagahapon ni Emely Villaver, ig-agaw sa biktima sa Banat News nga si Camelo kauban sa iyang mga higala, kalit nga miduol si Delima ug gibusdak ang dala niining pusil diha sa atubangan ni Camelo ug sa mga higala niini.

Matud ni Emely nga giingnan ni Camelo si Delima nga "hambogeroha ninyo abi naa moy dala" ug gipunit ni Camelo ang maong pusil og nahitabo ang inilogay.

Si Camelo midagan paingon sa ilang balay tungod kay nabawi man ni Delima gikan kaniya ang pusil niini hinungdan nga nahitabo usab ang ginukdanay.

Si Camelo napusilan ni Delima dihang duol na kini sa ilang balay.