Kini maoy labing dakong trahedya sa estampede sa kasaysayan sa Pilipinas gumikan lang sa pagpanimpalad nga makadaog sa usa ka gameshow sa telebisyon ug ang uban buot rang makasaksi sa kasadya sa maong programa.
Ang maong insidente nagsugod pasado alas 6 sa buntag diin libuan ka mga tawo ang nanaglinya diha sa ganghaan aron makakuha og ticket, matud pa sa kapolisan nahitabo ang dinutdutay sa mga tawo dihang ang mga organizers nagsugod na og panghatag og tickets, nasayran nga ang ubang mga tawo niadto pang milabay'ng Miyerkules naglinya ug giagwanta ang milabay'ng mga adlaw hangtud kagahapon aron lang makasulod.
Duna say mitug-an sa kapolisan nga dunay kalit lang nga misinggit nga dunay bomba maong nangaratol ang mga tawo ug nagtuluranay hangtud nga nahitabo ang estampede.
Ang maong noontime show nga gi-host sa aktor nga si Willie Revillame gikatakdang manghatag og P1 milyon, usa ka house and lot ug usa ka awto isip premyo atol sa maong anibersaryo, apan gumikan sa insidente ang ABS-CBN Broadcasting Corporation mikanselar sa maong show.
Kasagaran sa mga namatay mga edaran, mga babaye ug mga bata gumikan sa karatol sa mga tawo nayatak-yatakan ang mga biktima, human sa paglinaw sa dapit nagpasad ang mga patay'ng lawas sa mga biktima, ang uban diha na sa mga tambalanan nakabsan sa ilang kinabuhi gumikan sa grabeng bun-og nga nahiaguman.
Si Bise Presidente Noli de Castro kinsa nangunay sa pagsusi sa gikahitaboan mipasabot nga sayo pa kaayo nga mamasol og mga tawo sa hitabo, apan gipasalig niini nga dunay himuong imbestigasyon ang kapolisan sa insidente ug kun si kinsa ang angayang manubag.
Lakip sa miadto sa gikahitaboan mao si Senador Richard Gordon kinsa nangulo sa mga rescuers gikan sa Philippine National Red Cross uban sa mga nagkadaiyang rescuers sa kauluhan lakip na niini ang militar nga mipadala og mga trak aron kargahan sa mga namatay pangadto sa Arlington Funeral Homes sa Pasig ug Medical City.
Si Charo Santos ang bise presidente sa ABS-CBN mipaabot sa pagbangutan ngadto sa mga biktima ug sa mga kabanay niini, mipasalig siya nga ang network moabaga sa mga galastuhan sa mga namatay, mga naangol ug mga nasakitan sa insidente.
Si Presidente Gloria Arroyo kinsa kasamtangang nakigtagbo sa presidente sa nasud sa India mipadangat usab sa iyang kasubo sa insidente ug gimandoan ang tanang ahensya sa gobiyerno sa pag-imbestigar sa insidente.
Dugang pa sa panawagan sa pangulo ngadto sa mga tawo mao ang pagkalma samtang gisusi pa kung si kinsa ang patubagon sa insidente.
Niadtong Hunyo 19, 2000 diha sa ganghaan sa ABS-CBN channel 2 sa Quezon City nahitabo usab ang susamang insidente dihang gibana-banang 20,000 ka mga tawong buot makasalmot sa "Pera O Bayong" sa noontime show nga Magandang Tanghali Bayan.
Niadtong tungura usa sa mga host mao gihapon si Willie Revillame inubanan nila ni Amy Perez, Christine Jacob, Roderick Paulate, John Estrada ug Randy Santiago.
Susama sa nahitabo kagahapon ang ubang mga misalmot kaniadto diha gihapon nangatulog gawas sa ganghaan aron makasigurong makasalmot sa gameshow nga Pera O Bayong, 32 ka tawo ang nangaangol samtang duha ang patay (dili kumpirmado).
Niadtong milabay'ng tuig usa ka dakong sunog usab ang miulbo sa usa sa mga barangay sa dakbayan sa Sugbu samtang gipahigayon ang noontime show ni Revillame diha sa Ayala business park, nga mitala usab og ubay-ubay nga nangakuyapan gumikan sa kainit ug sa giingong kakulang sa eksperyensya sa mga gwardiya sa susamang mga sitwasyon.
Hinuon walay kalambigitan ang maong show sa maong sunog nga mikaon sa gibana-banang usa ka gatos ka panimalay apan pipila sa mga nanan-aw sa Wowowee mga residente sa maong barangay.