29 ka babaye giluwas sa NBI 7

Kawhaan og siyam ka mga babaye ang nasalbar sa mga sakop sa National Bureau of Investigation atol sa operasyon batok sa prostitusyon diha sa Steve's KTV bar sa dalan Mango Avenue ning dakbayan sa miaging gabii, duha sa mga babaye nasayrang mga minor de edad pa.

Ang grupo ni Atty. Ernesto Macabare mipadala og duha ka ahente sa NBI diha sa maong bar ug nagpakaaron-ingnong kustomer ug buot nga mangabang og babaye nga dad-on sa gawas.

Tuod man dihang gibayran ang floor manager nga si Grace Guisando og P4,000 nga marked money isip bar fine daling mihasmag ang ubang mga ahente sa NBI ug giaresto ang floor manager.Giila sa NBI ang tag-iya nga mao ang usa ka Jocelyn Raco nga taga Tres de Abril, Labangon ning dakbayan.

Ang mga babaye daling gidala sa buhatan sa NBI samtang ang duha ka mga minor de edad giturn-over ngadto sa buhatan sa Department of Social Welfare and Development (DSWD).

Atol sa operasyon dunay duha ka mga sakop sa Traffic Management Group ang tua sa maong bar isip mga kustomer ug wala nalang dakpa gumikan kay walay nakitang basehan ang NBI alang niini.