Mangaoang moapil sa training sa Tokyo

Si Cebu Customs District Collector Ma. Lourdes Mangaoang napili isip usa sa tulo ka district collector nga morepresentar sa Pilipinas sa usa ka training didto sa Tokyo, Japan karong Pebrero 13 ngadto sa 21.

Dungan niini, si Mangaoang moapil usab og roadshow sa Philippine Economic Team sa Japan sa Pebrero 13 ngadto sa 15 nunot sa tinguha sa gobyerno pagdala og dugang mga puhonan nganhi sa nasud.

Pinaagi sa paninguha sa Customs and Tariff Bureau sa Finance Ministry sa Japan, ang walo ka adlaw nga training apilan usab sa laing 13 ka middle ug senior management level customs officials gikan sa regional offices ug headquarters sa Pilipinas ug Indonesia.

"The activity aims to improve basic management knowledge and skills of customs officers," si Mangaoang nagkanayon. "After completing the course, participants will be able to manage the daily operations of their ports as well as supervise their subordinates better," dugang pa niya.

Uban ni Mangaoang ang laing tulo ka opisyal sa Bureau of Customs nga sila si Collectors Lina Molina sa Batangas, Ronnie Sylvestre sa Clark, ug John Simon, hepe sa international affairs division. Silang upat gipili base sa ilang leadership potentials ug performance isip mga customs collector.

Ang training program naglakip sa Strategic Management, Operational Management, Human Resource Development, Project Cycle Management ug Walkthrough sa regional customs office sa Tokyo o Yokohama.

Ang mga partisipante motuki usab sa simplified export procedures alang sa mga negosyante.

Sa laing bahin, ang roadshow nga apilan ni Mangaoang pagatambungan usab sa mga kalihim sa Finance, Trade and Industry, ug Energy ug ang duha ka commissioner sa customs ug internal revenue.

"Our economic team will be there to convince more investors to come to the Philippines and take advantage of our improved business climate brought about by the government's economic reform agenda," pasabot pa ni Mangaoang.