3-anyos napasok, laing 3 patay

Upat ang namatay sa aksidente sa kadalanan gikan sa managlahing higayon nga nahitabo dinhi sa lalawigan sa Sugbo usa sa mga biktima tres anyos nga batang lalaki kinsa napasok ilawom sa pasaheruang bus.

Ang bata mao si Kendrick Dale Lim, 3 anyos nang taga Sitio Bonbon sa barangay Pasol lungsod sa Alcoy. Sumala pa ni SPO3 Celso Cabrillas sa Alcoy police station ang biktima diha gibilin sa iyang apuhan sa iyang mga ginikanang nagtrabaho sa dakbayan sa Sugbu dihang kalit kining milabang sa kalsada nasyunal sa maong dapit.

Ang Sun Rays bus nga may plakang GWD 410 nga gimaneho ni Medasto Nubo, 45 anyos, minyo nga taga Canlomacad, Santander kinsa gikan pa sa Cebu City ug padulong sa habagatang bahin sa lalawigan maoy nakadasmag sa bata.

Matud pa nga napasok diha sa ilawom sa maong bus ang biktima hinungdan sa pagkapisak sa ulo niini ug nakaingon sa hinanali niining kamatayon, ang suspek malinawong mitahan ngadto sa kapolisan human sa insidente.

Samtang laing aksidente, patay usab ang usa ka lalaking nagbisekleta diha sa National Highway diha Barangay Guiwanon sa lungsod sa Compostela alas 8 pasado ang takna sa miaging gabii.

Si Cesar Melendres Pareja, 30 anyos, minyo nga nagpuyo usab sa maong dapit kinsa nagmaneho sa iyang bisekleta matud pa ni PO2 Achilles Tano sa pakighinabi sa Banat News misampak sa simod sa usa ka crane type nga trak nga gikasugat niini.

Ang Mitsubishi Fuso Canter nga may plakang YAD 443 nga gimaneho ni Lourence Ygona Jr., hingkod ang panuigon, minyo nga taga Lower Kalunasan sa dakbayan sa Sugbo gikan pa sa amihanan padulong uli sa dakbayan sa Sugbu ang gikaengkwentro sa biktima.

Tungod sa kusog kaayong impact sa maong pagdasmag nalagpot ang biktima nga maoy nakaingon sa dakong kadaut sa ulo ug lawas niini.

Gidala unta ang biktima sa Danao District Hospital ni Ygoña apan gideklarar kining patay na.

Samtang sa samang adlaw usa ka Patricio Pilapil, hingkod ang panuigon, minyo nga nagpuyo sa barangay Tabok sa dakbayan sa Mandaue ang nahisama sa kapalaran ni Pareja dihang kalit kining nadasmagan sa motorsiklo nga gimaneho ni Eduardo Miro, hingkod ang panuigon, minyo ug nagpuyo usab sa maong dapit.

Dali nga gidala ang biktima sa Vicente Sotto Memorial Medical Center sa dakbayan sa Sugbo apan gikatahong nakabsan gayod kini sa gininhawa.

Dugang namatay sa aksidente sa Mandaue mao si Oligario Casas, 56 anyos, minyo nga taga Mantuyong, Mandaue sa samang adlaw kinsa nabiktima sa hit and run diha sa dalan Ouano Avenue sa Reclamation Area sa usa ka pick-up nga may plakang YAT-728.

Nakabaton og grabeng kadaut sa kalawasan ang biktima ug namatay kini sa tambalanan nga gidad-an kaniya.

Si SP01 Anaclito Lauronilla sa traffic division sa pakighinabi sa Banat News mibutyag nga gipanag-iya sa usa ka Elmer Villarta nga taga Tipolo ang maong sakyanan.

Si Villarta nga maoy mipahibalo sa kapolisan nga atol sa aksidente ang nagmaneho sa maong sakyanan mao ang driver niyang si Raul Rumago nga taga Negros Occidental.Si Rumago misibat human sa hitabo.