Sakyanan sa polis gilungkab

Usa ka polis nga gilungkab ang sakyanan ug gikawatan midangop sa Presinto 1 sa Centro Police Station sa siyudad sa Mandaue.

Nahitabo ang pagpanglungkab ala 1 pasado ang takna sa miaging kaadlawon sa dalan M.C. Briones sa barangay Guizo, siyudad sa Mandaue.

Ang biktima mao si P03 Eduardo Cabase, hingkod ang panuigon, minyo ug nadistino sa Presinto 2 sa Subangdaku Police Station, Mandaue.

Matud niini ngadto sa mga polis sa Presinto 1 nga gi-parking niya ang iyang multicab nga sakyanan sa daplin sa dalan sa maong lugar ala 1 pasado ang takna sa miaging kaadlawon.

Pipila ka gutlo ang nakalabay sa iyang pagbalik ang sterio sa mao niyang sakyanan nga kapin sa P6,000 ang kantidad daw sayon lamang kaayong gikawat.

Hinuon si P03 Cabase sa iyang pamayahag ngadto kang P03 Miguel Estrada maoy gitug-an niini ang pangalan sa usa ka estambay nga Cocoy maoy gituohan niyang naglungkab sa iyang sakyanan.

Dugang pa ni Estrada nga ilang gipangita ang suspetsado apan dali kining nakasibat pahilayo sa maong dapit.