Naatrasa'g trak, 1 patay

Usa ka babaye ang namatay ug grabeng naangol ang kaubang babaye niini human maatrasi sa padulong kabalitok nga trak sa basura diha sa usa ka bung-aw sa Sitio Oyong, barangay Hingatmongan lungsod sa Balamban niadtong nakalabay'ng adlaw.

Ang biktima giilang si Malenda Rabanes, 40, kinsa napiit diha sa trak ug nagrabehan usab ang ulo sa kauban niining si Mary Jane Bitoon, 26, minyo ug molupyo sa barangay Lamisa.

Ang maong garbage truck nga may plakang XNA-133 gipanag-iya ni Engr. Alan Adlawan nga taga Sitio Immaculada, barangay Nangka sa samang lungsod nga nanag-iya usab sa Adlawan Construction Company nga gimaneho ni Rudy Diacosta, 41, minyo ug molupyo sa barangay Lamisa.

Sumala pa ni PO2 Julius Obañana sa Balamban police nga kasamtangang mitaak sa subidahon ug nakurbadang dalan ang maong trak dihang kalit nga mipalyar ang gear niini ug kalit nga miatras.

Ang mga biktima gikatahong kasamtangang naglakaw diha sa luyo sa maong trak ang nakalitan sa pag-atras niini ug napiit sa maong trak nga mibalitok dayon.

Matud pa ni PO2 Obañana, ang drayber daling nakasalbar sa iyang kaugalingon apan duha ka mga biktima naatrasan gyud " Wa man maunsa ang driver, ang kato ra mang duha nga naatrasan kay sagkaon man gud tong dapita,"sumala pa sa maong polis.

Patay na si Rabanes dihang nadala sa Balamban District Hospital samtang si Bitoon nakaangkon og grabeng kadaut sa ulo. Ang suspek kasamtangan nang gitanggong sa karsel sa kapolisan.