Nag-huramentado sa kampo napatay

Usa ka wala mailhing lalaki napusilan ug namatay human kini giingong naghuramentado ug nanghagit sa mga sundalo dayon misulod sa Central Command samtang nagdala-dala og mahait nga hinagiban kagahapon sa buntag.

Ang biktima kinsa wala pa mailhi gibana-banang nagpangidaron og 30 ngadto sa 40 anyos, nagsuot og shorts ug kolor puti nga t-shirt, samtang walay nakuhang ID sa biktima.

Sumala pa sa imbestigasyon nila ni PO3 Henry Estoy sa Homicide Section sa Cebu City Police Office atol sa pakighinabi sa Banat News ang girespondehan sa mga sakop sa Crime Supression Unit human ang mga sakop sa Military Police diha sa gate mitawag sa kapolisan.

Giingong gisitar ni Staff Sgt. Joshue Umpad ang maong tawo dihang misuway kini og sulod, matud pa nga gitubag siya niini nga mosulod siya kay duna siya'y patyon diha sa kampo hinungdan nga wala siya pasudla sa guwardiya.

Apan giingong namugos ang maong tawo hinungdan nga gitawgan niini ang mga kaubang alert team niadtong adlawa ug gipahibalo ang barangay sa nanghitabo, samtang ang barangay usab ang mitawag sa kapolisan.

Nianang hitaboa matud pa nga gihagit sa maong lalaki si SSgt. Umpad diha sa ganghaan sa pag-ingon "bunota imong 45 kay diay akong kutsilyo."

"Ila lagi kunong gibadlong kay magsige naman og dasmag, misulod lagi kuno sa left gate sa agianan og tawo hangtud naabot didto sa gikahimutangan sa CSU gidasmagan sila si Cobo mao to gipusil nalang nila," sumala pang Estoy.

Matud pa ni Estoy nga napugos si PO3 Jose Cobo sa CSU mobile patrol 504 pagpusil sa biktima gumikan kay armado kini og kutsilyo.

Ang biktima nakaangkon og samad diha sa iyang walang tuhod ug bitiis, ug tuong bahin sa kilid ang gidali og dala sa Cebu City Medical Center apan nakabsan kini sa iyang kinabuhi dangtan og pila ka gutlo.

Wala pay mga kabanay nga misusi sa biktima aron pag-ila niini.