Lapu' police gisungog

Daw gisungog pag-ayo ang kapolisan sa dakbayan sa Lapu-Lapu nga ning bag-uhay lang midawat og pasidungog isip Best City Police of the Year sa tibuok Pilipinas , kini human lain na usab nga pagpanulis sa usa ka cellshop store ang nahitabo sa miaging gabii.

Ang gitulis alas 6 pasado ang takna sa gabii mao ang Aqua Cellular Store nga gipanag-iya ni Ruby Ann Iyas nga nahimutang sa barangay Basak sa maong siyudad, kini maoy ikaduhang higayon nga dunay gitulis nga establisamento sa maong dakbayan atol nga gidawat sa ilang hepe nga si Sr. Supt. Louie Oppus ang pasidungog didto sa Camp Crame.

Usa ka tawo nga gibanabanang nagpanuigon og 30 ngadto sa 35 ug 5'4 ang gitas-on ug kasarangan lamang ang gidak-on sa panglawas ang mitulis sa maong establisamento kinsa nagluwan sa usa ka kolor pulang motorsiklo.

Si SPO1 Andres Gahi sa Theft and Robbery Section sa kapolisan sa maong siyudad nga gikahinabi sa Banat News nagkanayon nga nakuha ang P4,500 cash nga salapi sa biktima ug duha ka mahalon nga nokia cellphone.

Niadtong kaadlawon sa samang adlaw gitulis usab ang usa ka gasoline station diin ang gwardiya gigapos sulod sa usa ka delivery truck samtang gilungkab sa mga suspek ang kaha niini ug nadala ang kapin P200, 000.