Vigilante killings malisod sulbaron kun way testigos

Manifesto nga gipadangat sa Catholic Bishops Conference of the Philippines nga nag-awhag sa National Bureau of Investigation aron pagtabang sa kapolisan pagsulbad sa nagtapun-og nga kaso sa vigilante style killings dinhi sa dakbayan sa Sugbu mahulog lang sa wala kun walay mobarog ug mopatim-aw nga mga testigo sa maong mga kaso.

Kini maoy giluwatang pamahayag ni NBI 7 regional director Medardo Delemos, sumala pa niya ang mga testigo maoy dako og ikatabang alang sa pagsulbad sa kaso, kun wala niini dili makapadayon ang kaso aron masulbad ang 116 ka mga pagpatay sukad niadtong milabay'ng Disyembre 22,2004.

Matud pa ni Delemos nga dili paigo ang mga ebidensyang slugs, mga basiyo ug uban pang physical evidences diha sa crime scenes aron makalahutay pagpasaka og kaso batok sa mga suspek kung walay suportang testimonya gikan sa mga testigo.

"Sa una dunay motestigo unta pero ni atras kay nahadlok,"matud pang Delemos sa The Freeman/Banat News.

Hinuon gibutyag ni Delemos nga bisan wala pa sila karoy testigo nagpadayon gihapon sila sa pagpaniid ug pag-imbestigar sa kaso, usa na niini ang pagtino kun binuhatan ra ba kini og usa ka tawo ug usa ka grupo ug posibleng kalambigitan sa mga impluwensyadong tawo nga maoy nagsuporta sa mga vigilante.

Sumala pa ni Delemos wala pa hinuon siya makadawat sa pormal nga awhag gikan sa CBCP o ba kaha kang Cebu Archbishop Ricardo Cardinal Vidal, apan iya nang gimandoan si Supervising Agent Hermie Monsanto sa pagsumitir sa iyang draft report sa tanang kaso sa vigilante style killings dinhi sa Sugbu.

Si Cebu Archdiocesan media liaison officer, Msgr. Achilles Dakay una nang namahayag nga gituki sa CBCP ang vigilante killings dinhi sa Sugbu didto sa Manila pinaagi sa pagpaabot niini ngadto ni Vidal hinungdan sa paghimo sa maong manifesto.

Kahinumduman sa wala pa ang manifesto sa CBCP, una nang miawhag ang Integrated Bar of the Philippines sa NBI-7 nga lihukon ang maong mga kaso, gani gisugdan kini sa maong buhatan subay usab sa kamandoan ni kanhi NBI director Reynaldo Wycoco ug Department of Justice Secretary Raul Gonzales niadto pang milabay'ng Oktobre.

Apan bisan usa walay napasakang kaso ang NBI gumikan kay walay mitestigo ug bisan na ang mga kabanay walay kooperasyon.