Barangay kapitan mihimakak

Gihimakak ni Camp 6 Barangay Kapitan Ramil Manayon ang pasangil batok kaniya ni Johnny Delos Reyes (JVR) usa ka politiko sa Talisay sa milabay'ng adlaw.

Si Delos Reyes mipasangil ni Manayon nga nanghasi kini atol sa gipahigayong Videoke contest sa nahisgutang lugar.

Uban ni Delos Reyes diha sa buhatan sa kapolisan sa Talisay para motaho sa insidente sila si Jaime Polan, Nestor Ruiz, Boy Gabison, Manoling Rabaya, Dennis Delos Reyes, Bobby Dela Rosa, Tony Gemparo ug Jun-Jun Tamuloc.

Matud ni Delos Reyes nga giimbitar siya ni Bebot Barcelonea, opisyal sa kapilya sa lugar para mo-sponsor sa nahisgutang bangga sa kanta.

Si Delos Reyes nagkanayon nga kalit mitungha si Manayon kinsa hubog ug nagkanayon nga duna kini buhaton para magkagubot ang mga tawong nanan-aw sa kalingawan.

Ug human sa pagsulti ni Manayon sa iyang bahad dunay namato og botilya ngadto sa mga manan-away ug mitungha pag-usab si Manayon kinsa nagwara-wara sa iyang pusil.

Daling mibiya si Delos Reyes sa lugar ug didto kini miagi sa laing dalan paingon sa dakbayan sa Toledo pabalik nga mopauli.

Gibutyag ni Delos Reyes ngadto sa kapolisan sa Talisay nga mitipas siya og agianan tungod kay dunay mga katahapang tawo nga nagsakay og motorsiklo nga nag-una na sa ilang agianan diin ang mga residente sa lugar ang nagpahibaw niya niini.

Si Manayon sa iyang habig nagkanayon kagahapon nga didto siya sa taas sa balay sa iyang paryente dihang gipahigayon ang videoke contest ug maayo ang nahitabong panag-istorya nila ni Delos Reyes.

Pagkanaog niya sa ubos sa balay sa iyang paryente nagkagubot na kini ug dunay binatoay og botilya.