Giliog, giulo sa pagtigbas sa iyang bayaw

Miapil-apil sa away sa managtiayon, usa ka lalaki ang giliog og tigbas lakip na sa ulo sa bana ra sa iyang paryenteng babaye diha sa Sitio Tabay barangay Daan Tawo, lungsod sa Asturias niadtong nakalabay'ng Domingo sa hapon.

Ang biktima nga milandig sa Balamban District Hospital giilang si Romeo Calo, 52, ug molupyo sa nahisgutang dapit human kini gitigbas ni Alison Pitogo, 29, bana sa paryente sa biktima.

Matud pa sa imbestigasyon sa kapolisan nga kasamtangang naglalis ang suspek ug asawa niini niadtong higayuna dihang miinterbiner ang biktima ug mibadlong sa suspek.

Apan ang suspek wala kauyon sa paagi sa pag-apil apil sa biktima kalit kining mibunot og bolo dayong hapos sa liog sa biktima duol sa walang dunggan padulong sa liog ingon man diha sa ulo niini.

Daling miikyas ang suspek sa maong lugar samtang gitabang pagdali ngadto sa tambalanan si Calo, dangtan ang pila ka gutlo mitahan sa iyang kaugalingon si Pitogo ngadto sa buhatan sa kapolisan.

Samtang ang barangay tanod nga si Alfredo Pableo nakarekober sa bolo nga gigamit sa suspek sa pagpanigbas, ang biktima gibalhin na usab ngadto sa Vicente Sotto Medical Center gumikan sa grabeng igo.